Ope brev til regjeringa frå SNU med eigarar

Ope brev til

Nærings- og handelsdepartementet v/ Nærings- og handelsminister Sylvia Brustad og

Miljøverndepartementet v/ Miljø- og utviklingsminister Erik Solheim

Utvikling av miljøteknologiprosjekt i Sunnhordland krev endring i dagens støtteordningar

På konferansen ” Miljøteknologi – Innovasjon, satsing og forretningsmuligheiter for industrien i Sunnhordland” som vart gjennomført på Stord, torsdag 20. august, vart det presentert små og store  miljøprosjekt frå bedrifter i regionen.

Konferansen vart arrangert i samarbeid mellom næringsutviklingsselskapet SNU as og  eigarane til selskapet, som er Fellesforbundet Sunnhordland, Fitjar kommune, Fitjar Næringsråd, Stord kommune og Stord Næringsråd .

Grunnlag for etablering av regional næringsklynge innan miljøteknologi i Sunnhordland

Verksemdene Eidesvik AS, Wärtsilä Norway AS og Aker Clean Carbon AS presenterte industriprosjekt som gir og kan gi store miljømessige gevinstar, samt kan gi eit nytt næringsgrunnlag for lokale verksemder i Sunnhordland. Ei felles utfordring for desse bedriftene, er at retningslinjene til Innovasjon Noreg og anna verkemiddelapparat ikkje er innretta mot større verksemder. For å lukkast med ei nasjonal og regional satsing innan miljøteknologi, må det takast utgangspunkt i dei store bedriftene. Desse bedriftene vil vera viktige kundar, drivkrefter og ressursar for å skapa ei regional næringsklynge innan miljøteknologi.

Dagens støtteordningar er ikkje tilpassa nyskaping innan miljøteknologi

På konferansen vart det også presentert nye miljøprosjekt av gründerar og SMB-bedrifter som har stort utviklingspotensiale både når det gjeld framtidige arbeidsplassar og miljøgevinstar. Døme på slike prosjekt er ”Tank Anti Pollution System” som selskapet Tool Tech AS presenterte på konferansen.  Konseptet kan hindra oljeutslepp ved skipshavari. Ei felles utfordring for desse gründerane, er at  støtteordningane ikkje er tilpassa miljøprosjekt.  For å søkja støtte til utvikling av teknologien gjennom ein IFU-kontrakt, vert det frå Innovasjon Noreg stilt krav til at ein krevjande kommersiell kunde skal delta i utviklingsprosjektet. For miljøprosjekt finnes ofte ikkje kunden i denne fasen. Miljøteknologi vert gjerne først teke i bruk når deira kundar vert pålagt bruk av den nye teknologien. Støtteordningane må virka i ein tidleg fase slik at ein får utvikla miljøproduktet i samspel med bl.a. FoU-miljø og framtidige kundar.

Stort potensiale for sysselsetting- og miljøeffektar, men krev politisk handling

Verksemdene i Sunnhordland har med sin sterke internasjonale industrikompetanse potensiale til å bli leiande innan miljøteknologi. Her finnes kompetanse og utviklingsmiljø bl.a.  innan materialteknologi, prosjektleiing, produksjon, samanstilling og engineering, noko som bør gi regionen store fortrinn i satsinga på miljøteknologi. Men for å lukkast med ei satsing innan miljøteknologi ,må styresmaktene  utvikla gode rammevilkår som inspirerer  næringslivet til satsing innan dette området. Arrangørane av konferansen vil difor utfordra Regjeringa til å utforma verkemidlar slik at industrien i Sunnhordland kan utvikla ny konkurransedyktig grøn teknologi  som vil gi positive sysselsettings- og miljøeffektar. Me ser fram til Dykkar svar.

Stord, 21. august 2009

Med venleg helsing

SNU AS                Fellesforbundet Sunnhordland                                                          

Fitjar kommune                  Fitjar Næringsråd            

Stord kommune                   Stord Næringsråd